અટકશે ક્યાં જઈને આ જમાનો, કો'ક તો બોલો,
વખત આથી ય શું ભારે થવાનો, કો'ક તો બોલો;

જનમ આ માનવીકેરો મળ્યો વરદાનરુપે, કે -
ખુદાએ લાગ ગોત્યો છે સજાનો? કો'ક તો બોલો;

હ્રદયની લાગણીઓ, પ્રેમ ને વિશ્વાસ - સંબંધો,
થશે અંજામ શું આખર બધાનો? કો'ક તો બોલો;

બધું ભૂલી જવું છે દોસ્ત મારે, બોલ શું કરવું?
અનુભવ છે અહિં કોને નશાનો, કો'ક તો બોલો;

હજારો વેદનાઓ મેં છુપાવી છે હ્રદયમાંહે,
મળે ક્યો આદમી આવા ગજાનો, કો'ક તો બોલો;

અનોખી આપણી મહેફિલ અને અંદાજ નોખો છે,
મળ્યો છે માંડ આ મોકો મજાનો, કો'ક તો બોલો;

અમે તો "પાર્થ" હૈયું ઠાલવી બેઠાં ગઝલરુપે,
ન રાખો આજ કોઈ ભેદ છાનો, કો'ક તો બોલો.